«Құдайдың балалары» атты қойылым сахналанды. Азиз Баймұғаммед шығармасының желісі негізінде қойылған бұл спектакль балалар үйіндегі тағдырлар арқылы адамзатқа ортақ маңызды мәселені көтереді.

Қойылымның басты өзегі – бауырмалдылық. Бір-біріне қанмен емес, жүрекпен жақын болған балалардың өмірі арқылы мейірімнің, қамқорлықтың, жанашырлықтың шынайы мәні ашылады. Балалар үйіндегі әр кейіпкер – өмірдің сынына ерте түскен, бірақ соған қарамастан жүрегіндегі жылуын жоғалтпаған жандар.
Сахнадағы «шелек», «палатка», жіпке ілінген киімдер секілді символикалық детальдар – олардың уақытша өмірін, ішкі жалғыздығын және өткенге деген сағынышын бейнелейді. Спектакльдің негізгі айтар ойы – адамды адам ететін тек туыстық байланыс емес, бауырмалдық пен мейірім. Әр бала – тағдыр тәлкегіне қарамастан, сүйіспеншілікке лайық Құдайдың баласы.